كريمة سرحان ... تحدت الضابط وتهديده .... وقالت لا للفساد

" أنا كنت واقفة مع الحق .. عشان كده ما خفتش من الظابط وتهديده ليه واتكلت على ربنا عشان كده لسه عندي الشجاعة إني أقف في وش اى ظلم أو فساد .. لان ده التصرف الطبيعي لأي إنسان شريف "
تلك هي بعض كلمات السيدة كريمة محمد احمد سرحان " المرشحة لجائزة المحاربة المصرية ضد الفساد لعام 2008 " وهى تعمل موظفة بالشهر العقاري وإثناء تأدية عملها تعرضت للضغط والتهديد من قبل ظابط الشرطة الذي طلب منها التوقف عن استخراج تصاريح وكلاء المرشح "محمود عوض " المنتمى " لجماعة الإخوان المسلمين " عن دائرة الجمرك والذي كان ينافس على مقعد الفئات مرشح الحزب الوطني " آمر ابو هيف " ...
 وعن تفاصيل الواقعة قالت "كريمة" : أنا كنت قاعدة على مكتبي بعمل توكيلات المرشحين وفجأة جالى تليفون من الظابط " فلان " وقالي : توقفي عن استخراج تصاريح وكلاء المرشح " محمود عوض "
فرديت عليه : إيه السبب وكمان رئيسي المباشر لم يطلب منى ذلك ، فرد الضابط :
 دواعي أمنية ؟! فرفضت الاستجابة لأمر الظابط وقلت له إني مستمرة في عملي لان ده حق المرشح أيا كان انتمائه السياسي وعندما عرضت الأمر على رئيسي المباشر قال لي: إستمرى في عملك .. وبالفعل كملت استخراج التصاريح لكن في حوالي الساعة 3 ظهراً يوم 12 يوليو الماضي دخلت سيدة شكلها غريب وقالت ليه : أنا ليه بطاقة عندك من 10 الصبح ولسه ماخلصتش  " وبعد كده بدأت وصلة سب وشتائم وحاولت التحرش بيه وضربي فتدخل الموجودين في المكان من بينهم محامين وقالوا ليه : ابعدي عنها ديه اتبعتت ليكى مخصوص !!
فحاولت الاستنجاد بأمن الإدارة لكن لم يتحرك احد لمساعدتي وفى نفس اليوم قدمت مذكرة لرئيسي في العمل عن الواقعة وفى 14 يوليو – بعد الواقعة بيومين – عملت محضر في النيابة وأنا هناك وصفت شكل الست أللي تحرشت بيه في المكتب – فرد عليه احد الضباط الموجودين وأكد انه عارفها وقال عنها " دية بتاعه امن الدولة " وانتهى الأمر إلى أن إدارة التحقيق في مصلحة الشهر العقاري " محل عملي " استدعتني للتحقيق خلال شهر أكتوبر بتهمة أنى سربت الواقعة للصحافة .. لكنهم حفظوا التحقيق في المصلحة ..
وتابعت كريمة قائلة" في البداية ماكنتش فاهمة ليه الظابط طلب منى التوقف عن العمل لكنى بعد كده فهمت أنهم عايزين يمنعوا احد المواطنين عن الترشح والانتخاب .. و" بعدين  يقولوا البلد فيها سيادة قانون " طب إزاى؟!!
.. وعشان كده أنا صممت على عمل التوكيلات لان ده احد أساليب محاربة الفساد والموقف اللي أخذته مفروض على كل إنسان يعمله ويقول لا للفساد بصوت عالي "
لماذا ترشيح كريمة سرحان لجائزة المحاربة المصرية ضد الفساد ؟
قالت السيد كريمة عبد الجبار التي تقدمت بترشيح واختيار " كريمة سرحان " لتكون إحدى المرشحين للجائزة : الست دية بسيطة جداً وظروفها المادية صعبة وخصوصاً إن زوجها متوفى من 20 سنه وهى التي تعول أسرتها وما فعلته كريمة قرأت عنه في الصحف وعرفت أنها في إسكندرية فقمت بالاتصال بها والتعرف على تلك السيدة الشجاعة الشريفة التي رفضت الفساد وواجهته دون خوف كان من الممكن  لــ " كريمة " أن تقبل تاخد رشوة مقابل توقفها عن العمل .. لكنها لم تفعل ذلك رغم ظروفها المادية الصعبة وراتبها الشهري البسيط ..ده حتى الآن لا تملك  ثمن تركيب  تليفون أرضى وهذا ما دفعنى لترشيحها لأنها تستحق ومثال محترم للمواطن المحارب للفساد بعكس ناس كثير عندهم السلطة والمال وبرده فاسدين أو بيتستروا على الفساد ؟!